الجميل والقبيح ... بين اللبس والتشليح

على اثر حوار طويل بخصوص الحرية الشخصية وثورة التعري ... وبالمقابل انتشار الضد والضد تماماً من  الدعوة لتغطية المرأة من رأسها حتى قدميها ... وحيث تكاثرت الفتاوى عن أن العين عورة ... والوجه عورة ... واليد عورة ... وحرمة التعامل مع الجزر والخيار ... قررت أن أكتب رأيي بكل شيء ... رأيي بالجمال، باللبس ورأيي بالمرأة ... على قد ما بقدر .. وفي البداية بحب اقول لأي حد ممكن يتوقع اني اجرح شعوره .. رجولته ... دينه ... تحرره ... اي اشي ممكن ينجرح ... يسكر الصفحة من هلأ ويروح ... 

من الأول وهيك على بلاطة ... الحوار بلش بسؤال صغير ... "شو رأيك بعلياء المهدي؟" ... وحكي بيجر حكي ... ما الكم بالطويلة ... انا شخصياً مش شايف أنه علياء المهدي بطلة ... وبنفس الوقت مش شايفها "قحبة" ... علياء وحدة متلها متل غيرها ... بحترم شجاعتها ... بعض الناس اعتبروها وقاحة ... وشو يعني حتى لو وقاحة ... برضو بحترمها ... لكن بنفس الوقت بحس انها زودتها شويتين ... يمكن هي مقتنعة انه هيك بتغير ... بس بصراحة انا مش شايف انها عملت اشي غير انها شلحت ... زي ما كل الناس بتشلح ... الفرق الوحيد انه في ما يقارب 8 مليون بني ادم راحوا يشوفوا ... بعيدا عن انه اغلبيتهم راحوا هناك يشوفوا ( وحدة مشلحة ) وبس ... لكن لو فرضت انهم كلهم راحوا عشان مقتنعين او اقتنعوا لما شافوا ... كان هسا الدنيا كلها تغيرت ... يا جماعة الخير 8 مليون بيقلبوا العالم ... بس على ما يبدوا انهم 8 مليون واحد بس بدهم يتفرجوا ... 

من الناحية التانية ... الشيوخ الي نازلينلي كل يوم والتاني بفتوى شو لازم يتغطى وشو لازم ينكشف من المرأة ... بصراحة ... نفسي العن ابوكم الاولاني ... وانتوا مال اهاليكم ... لهالدرجة نفسكم مفتوحة ... يعني هاد تبع المرأة تغطي عينها ... يعني معقول انتا ما بتقدر تمسك حالك لو شفت عين ... ورح تدق فيها على طول ... يا ابن الحلال - بحطش بذمتي - اتقي ربك ... طيب مش ربك امرك تغض البصر ... بتقلي وهم امرهم بالستر ... يعني اذا هم ما اتستروش ... حضرت جنابك تبطل تسمع كلام ربك ... معلش يا حبيبي ... هاي تصرفات اطفال روضة ... هي ما عملتش الواجب ليش انا اعمله ... وبعدين معكم ... المرأة مش زي ما انت بتفكر ... المرأة مش شقفة لحمة ... صفط بقلاوة ... مصاصة ... سدر هريسة ... ولا جوهرة كمان ... المرأة مرأة ... بشر .. انسانة ... بتفرقش عنك كثير ... بالعكس ... يمكن انتا الي مش بشر حتى ... 

هسا وقت نحكي عن الجمال ... وعشان ما نتوه ... بدي احكي عن الجمال الخارجي الانساني ... عشان محدش يستظرف ويقلي مهو البسة حلوة ... والتخاريف تبع هالحكي ... وعشان نحكي عن الجمال .. لازم نعرف شو هو الجمال بالاول ... في ناس بتفكر الجمال هو مقياس قدرة الشخص على التسبب بالاثارة الجنسية عند افراد من الجنس الاخر - واحياناً الجنس نفسه - او بمعنى اخر ... كل ما كان الحدا (sexy) كل ما كان احلى ... بس انا بشوف كثير بنات جميلين ومش شايف انهم (sexy) ... مش يمكن انا الغلطان؟ ... عشان نحكي عن الجمال لازم نعرف الأول كيف نفصل الجمال عن الإغراء ... وكيف نميز بين الأنوثة والمثيرات الجنسية ... الجمال مش قديش صدرها كبير ... ولا قديش اردافها متناسقين ... ولا قديش هي طويلة او قصيرة ... ناصحة او ضعيفة ... الجمال اشي تاني ... الجمال هو هداك الاشي الي بيخليك مبسوط بس تشوفها ... بدون ما تفكر بالجنس ... تكون مرتاح لدرجة انك نفسك تشوفها كل يوم ... متل ما هي ... بدون ما تفكر شو في تحت تيابها أو كيف رح يكون ملمس بشرتها تحت اصابعك ... الجمال نسبي لانه كل واحد فينا غير عن التاني ... وكل واحد بيشوف الاشياء من زاوية تانية ... بس اكيد اكيد ... مش لازم كل الناس يشوفوا الاشياء من الزاوية الي تحت ... 

وهسا اجينا للمهم... اللبس .. اول حاجة انا كـ شب طبيعي ... ما بفضل يكونوا النساء مغطيين ... مش عشان اشي ... بس والله العظيم انهم حلوين ... يعني الوضع الطبيعي انه يكونوا ماشيين حوالينا ... ولطيفين ... بشعر او بحجاب ... ببنطلون او بعباية ... بتنورة او فستان .. كلهم حلوين ... ووجود التنوع الطبيعي هاد بيحسسك بانك مش شاذ ... مش بحاجة يكونوا كل الحوالي متل بعض ... قالب واحد عشان احس بالراحة ... انا بني ادم ضارب ومجنون ... لو كل الناس كانوا سيستيم واحد انا رح احس حالي شاذ عنهم كلهم ... لاني مش متلهم ... احنا بني ادمين مختلفين ... وطبيعي كل واحد فينا يكون ماشي بطريقته ... بحالته الخاصة ... بلبسه الخاص ... وانا كـ شب ... عادي بستمتع لما اشوف وحدة او تنتين مغريات بالشارع من وقت لآخر ... مش غلط ... الحياة هيك ... خليه يكون في كل شي ... عشان نحس انه احنا عايشين طبيعيين .. ومع هاد الحكي كله ... انا مش مع انه يمشوا الناس مشلحين بالشوارع ... يعني بصراحة هيك ... مش عارف شو احساسي لو كل الناس الي بالشارع بيمشوا مش لابسين اشي ... يا جماعة الخير ارحموا اهلي ... في اشياء انا مبديش اشوفها ... مطلبتش اشوفها ... ورح يصيبني مرض نفسي طول عمري من وراها ... وانتا وياها بتفرجيني اياها هيك ... طيب احترم عدم رغبتي بشوفها ... فرجيها لاصحابك ... لصاحباتك .. بس مش الي يا اخي ... حرام ... والله العظيم حرام ... 

رأيي بالمرأة ... مممممممممم ... انا بحب المرأة ... والله العظيم بحبها ... بحبها كتير كمان ... وحاسس انه في مجال كتير الها بهالدنيا ... واحنا يا الرجال عجبنا عليها ... بس برضو انا مش مع جماعة الفيمينيستي هدول ... لانه برأيي الشخصي هاي مش المرأة ومش الي المفروض تكون عليه المرأة ... المرأة متلها متل الرجل ومن حقها تعمل كل اشي هو بيعمله ... لكن لازم نعرف نتعامل بالاختلافات الموجودة والاحتياجات المختلفة ... مش بس نعطيهم كل شي متل بعض ... المرأة بتختلف عن الصورة النمطية للمرأة في المجتمع ... وبرضو بتختلف تماما عن صورة المرأة في المجموعات الي بتنادي بالمساواة ... الي المفروض يصير مش المساواة ... المفروض يصير ... اعادة تفاهم ... توعية شاملة للكل ... عشان لما انتا زلمة ... او انتي امرأة ... وما بتحترم غيرك لو شو ما عمل ... لا فيك ولا في مساواتك يا حبيبي انتا وهي ... اه ... احترموا بعض ... وبس ... مش مساواة ولا غيره ... كل الي ناقصنا الاحترام ... الاحترام وبس ... فاهمين ... :P 

ملخص الحديث ... انا مش مع انه كل النساء يلبسوا ... ولا مع انهم يشلحوا - تفهمونيش غلط  بحب لما يشلحوا برضوا - انا مش مع انه كل الناس يكونوا متل بعض ... ولا انه يكونوا ناس فوق وناس تحت ... ولا بدي حدا يتحكم بحدا ... بدي اياكوا تصحوا نتوفة ... وتفكروا ... وبالاخر تقوموا تقولوا انا اليوم بدي احترم كل الناس ... شو ما عملوا ... ونشوف لو الدنيا بتصير احسن ولا لأ ... وبس